Қазақстандық шахматшылар Азия чемпионатында 20 медаль жеңіп алды

Қазақстан шахмат федерациясының мәліметінше, ұлттық құрама қоржынына 3 алтын, 10 күміс және 7 қола түсті.

Қазақстаннан 22 шахматшы қатысты

2-10 қазан аралығында өткен жарысқа 12 елден 314 жас шахматшы қатысты. Қазақстан атынан 22 спортшы сынға түсті.

Чемпионат алты жас санаты бойынша, ұлдар мен қыздар арасында бөлек өткізілді. Медальдар үш дисциплинада сарапқа салынды:

• классикалық шахмат;
• рапид;
• блиц.

Жалпы тоғыз қазақстандық шахматшы жүлдеге ілікті. Олардың үшеуі бірден үш дисциплинада да медаль жеңіп алды.

Кім қандай жүлде алды?

Астаналық Алдияр Жауынбай 15 жасқа дейінгі санатта классикалық шахматтан Азия чемпионы атанды.

14 жастағы шахматшы 9 мүмкін ұпайдың 7,5-ын жинап, жарыс аяқталуына бір тур қалғанда чемпиондықты қамтамасыз етті. Сонымен қатар ол рапидтен – күміс, блицтен – қола медаль алды.

11 жасқа дейінгі санатта өнер көрсеткен астаналық Әлихан Сағынтаев блицтен Азия чемпионы атанды. Ол классикалық шахмат пен рапидтен екі күміс медаль жеңіп алды.

9 жасқа дейінгі қыздар арасында Амалия Едрешeва классикалық шахматтан топ жарды. Ол рапидтен де қола жүлде иеленді.

Басқа жүлдегерлер

7 жасқа дейінгі санатта Алинұр Бауыржан* үш медаль алды: блицтен күміс, классикалық шахмат пен рапидтен қола.

13 жасқа дейінгілер арасында Әлімжан Жауынбай классикалық шахматтан күміс, рапидтен қола жеңіп алды.

15 жасқа дейінгі санатта Әділ Азатжан классикалық шахматтан қола, блицтен күміс алды.

Қыздар арасында Аяру Алтынбек 17 жасқа дейінгі санатта рапид пен блицтен екі күміс жүлде иеленді.

Ақнұр Мамакова 15 жасқа дейінгі санатта рапид пен блицтен екі рет екінші орын алды.

Ал Ақниет Күмісбай 13 жасқа дейінгі қыздар арасында блицтен қола медаль жеңіп алды.

Қазақстанның қорытынды нәтижесі

Осылайша, Қазақстан құрамасы мектеп оқушылары арасындағы Азия чемпионаты медаль саны мынадай:

• 3 алтын
• 10 күміс
• 7 қола

Фото: sportarena.kz.