Майамидегі «Хард Рок» стадионында өткен H тобының кездесуі 2:2 есебімен аяқталды.
Матчтағы есепті 21-минутта Кабо-Верде құрамасының жартылай қорғаушысы Ленини ашты. Алайда бірінші таймның соңына қарай Уругвай ойынды өз пайдасына бұра білді. Алдымен Максимилиано Араухо таразы басын теңестірсе, үзіліске қосылған уақытта Агустин Каноббио оңтүстікамерикалықтарды алға шығарды.
Дегенмен Кабо-Верде екінші таймда да мінез көрсетті. 61-минутта Элио Варела мергендігімен көзге түсіп, командасына маңызды бір ұпай сыйлады.
Бұл – Кабо-Верде құрамасының әлем чемпионатындағы қатарынан екінші сәтті нәтижесі. Алғашқы турда олар Испаниямен 0:0 есебімен тең ойнап, турнирдегі басты сенсациялардың бірін жасаған еді. Енді екі дүркін әлем чемпионы Уругвайдан да ұпай тартып алды.
Осылайша Кабо-Верде құрамасы дебюттік әлем чемпионатында плей-оффқа шығу мүмкіндігін сақтап қалды. Команда соңғы турда Сауд Арабиясымен кездеседі. Ал Уругвай құрамасы Испанияға қарсы ойнайды.
Екі матч та 27 маусым күні өтеді.
Фото: © Anadolu / Contributor / Anadolu.
