Сауд Арабиясы мен Уругвай 2026 жылғы футболдан әлем чемпионатының H тобындағы алғашқы кездесуінде 1:1 есебімен тең түсті, деп хабарлайды kaz.inform.kz.
Есепті 41-минутта Сауд Арабиясының қорғаушысы Абдулелах Аль-Амри ашты. Ол бұрыштық соққыдан кейінгі қайтарылған допқа бірінші жетіп, гол соқты. Эрве Ренар жаттықтыратын команда матчтың көп бөлігінде басымдық сақтап, сенсациялық жеңіске жақын болды.
Уругвайлықтар үзілістен кейін қысымды күшейтіп, негізгі уақыттың аяқталуына 10 минут қалғанда есепті теңестірді. Федерико Виньяса жасаған баспен соққыдан кейін Макси Араухо қайтқан допты бірінші болып қағып алып, қақпаға енгізді.
Ойынның соңында оңтүстікамерикалықтар жеңісті жұлып алуға тырысты, бірақ Сауд Арабиясының қақпашысы Мұхаммед Аль-Овайс командасын тең нәтижемен құтқарып қалды.
Бірінші турдан кейін H тобында толық теңдік сақталды. Бұған дейін Испания дебютант Кабо-Вердемен ойында күтпеген жерден ұпай жоғалтып, кездесуді 0:0 есебімен аяқтаған болатын.
Айта кетейік, 2026 жылғы Әлем чемпионаты тарихтағы ең ауқымды турнир болмақ. Алғаш рет финалдық кезеңде 48 құрама ойнайды, олар 12 топқа бөлінген. Плей-офф кезеңіне 32 команда шығып, чемпиондық жол 1/16 финалдан басталады.
Фото: FIFA.
