Жартылай жеңіл салмақтағы жекпе-жекте Дәуітбек жергілікті спортшы Рен Хирамотомен кездесті. Үш раундқа созылған айқастың қорытындысы бойынша төрешілер жеңісті жапониялық файтерге бөлек шешіммен берді.
Кездесуге дейін Қаршыға айқын фаворит саналған еді. Қазақстандық спортшының еншісінде 19 жеңіс пен үш жеңіліс болса, оның 15 жекпе-жегін мерзімінен бұрын аяқтаған. Ал Хирамото октагонға төрт жеңіс және үш жеңіліспен шықты.
Осы нәтиже Дәуітбектің ұзаққа созылған жеңісті сериясына нүкте қойды. Оның кәсіпқой ММА-дағы көрсеткіші 19 жеңіс пен төрт жеңіліске өзгерді. RIZIN ұйымындағы есебі — бес жеңіс, екі жеңіліс және бір өтпеген жекпе-жек.
Рен Хирамото кәсіпқой мансабындағы бесінші жеңісіне қол жеткізді. Кикбоксингтен келген жапониялық спортшы бұған дейін ММА ережесі бойынша соңғы рет 2024 жылғы шілдеде жұдырықтасқан болатын.
Қаршыға Дәуітбек Жапонияда ерекше танымалдыққа ие болған қазақстандық файтерлердің бірі. Ол бұған дейін RIZIN турнирлерінде бірнеше жарқын жеңіске жетіп, жергілікті жанкүйерлердің ықыласына бөленген еді.
Фото: видеодан кадр
