«Қайрат» ФК УЕФА Чемпиондар лигасының бірінші іріктеу кезеңіндегі қарымта матчқа қатысу үшін Черногорияға барды, деп хабарлайды penalty.kz.
Алматылықтар Подгорицаға келді
Клубтың әлеуметтік желідегі ресми парақшасында футболшылардың Черногорияға ұшып келген сәтінен видео жарияланды. Кадрлардан команда мүшелерінің ұшақтан түсіп жатқанын көруге болады.
Бейнежазбада қақпашы Темірлан Анарбеков, жартылай қорғаушы Рамазан Бағдат, қорғаушы Еркін Тапалов және өзге де ойыншылар көрінген.
“Біздің алғашқы аялдамамыз – Подгорица қаласы”, – деп жазды клубтың баспасөз қызметі.
“Сутьеска” – “Қайрат” матчы қашан өтеді?
Черногориялық “Сутьеска” мен алматылық “Қайрат” арасындағы Чемпиондар лигасының бірінші іріктеу кезеңінің қарымта кездесуі 15 шілдеден 16 шілдеге қараған түні өтеді.
Матч Никшич қаласындағы “Край Бистрице” стадионында ұйымдастырылады.
Қос команда арасындағы алғашқы кездесу 8 шілде күні Алматыда өткен. Тартысты матчта “Қайрат” 2:1 есебімен басым түсті. Алматылықтар сапынан қорғаушы Лукас Африко мен шабуылшы Марк Гуаль гол соқты.
Фото: instagram.com/f.c.kairat.
