Тұрсынғали Еділов Қазақстан құрамасының Олимпиадаға дайындығы туралы пікір білдірді, деп жазады 1bol.kz.
Осыған байланысты ардагер жаттықтырушы Тұрсынғали Еділовтен Қазақстан құрамасының Азиададағы өнері, боксшылардың дайындығы және Лос-Анджелес Олимпиадасына дейінгі жұмыс туралы пікірін сұраған едік.
Маманмен кеше сұхбаттасқан сәтімізде Төрехан Сабырханның да мүмкіндігіне тоқталған болатын. Бүгін қазақстандық боксшы Өзбекстан өкілі Шавкатжон Болтаевты жеңіп, Азия ойындарының финалына шықты.
Еділов Төреханның бабында екенін айтып, оның чемпион атануға толық мүмкіндігі бар екенін жеткізген.
«Төрехан қазір бабында. Оған қарсыласының іс-әрекеттері әсер етпейді деп ойлаймын. Бірақ алаң иесіне белгілі бір басымдық берілуі мүмкін. Сол себепті Төрехан бірінші раундтан белсенді қимылдап, шаршы алаңның қожайыны өзі екенін дәлелдеуі қажет. Ағасы Махмұд Сабырхан сияқты жеңісті жұлып алу керек. Ал Төреханның чемпион атануға қарым-қабілеті де, шамасы да толық жетеді», — деген еді Тұрсынғали Еділов.
Бүгін Төрехан Сабырхан жартылай финалда Шавкатжон Болтаевты жеңіп, финалға жолдама алды. Осылайша, маманның кеше айтқан пікірі бүгінгі нәтижеден кейін қайта өзекті болып отыр.
«Айбектің жеңіске жететініне 80 пайыз сенімдімін»
Тұрсынғали Еділов аса ауыр салмақтағы Айбек Оралбайдың да Азия ойындарындағы мүмкіндігіне жоғары баға берді. Қазақстандық боксшы финалда Өзбекстан өкілі Жахонгир Зокировпен кездеседі.
«Айбек қазір психологиялық тұрғыдан дайын. Ол бұған дейін әлем чемпионатында дәл осы өзбекстандық Жахонгир Зокировті жеңген. Сол себепті Айбектің жеңіске жететініне 80 пайыз сенімдімін», — деді маман.
«Назым жас буынға орын беруі керек»
Еділов Назым Қызайбайдың жаңа салмақ дәрежесіне ауысқаннан кейінгі жағдайына да тоқталды.
«Назым Қызайбай жаңа салмаққа ауысқаннан кейін жылдамдығын жоғалтып алды. Оның үстіне жасы да келіп қалды. Назымның салмағында қаншама жас боксшы бар. Сондықтан ол енді жас буынға орын беруі керек деп есептеймін.
Ал өзі алдағы Олимпиадада тек алтын медальді көздеп, сол мақсатпен ғана жұдырықтасуы қажет. Бізге қола да, күміс те керек емес. Егер ондай мақсат болмаса, басқа жас боксшыларға орнын бергені дұрыс», — деді ол.
«Боксшыларды жарыстан жарысқа сала беруге болмайды»
Ардагер бапкер қазіргі құрамның Лос-Анджелес Олимпиадасына дайындалуға қауқары жететінін айтты. Алайда спортшыларды шамадан тыс жарысқа қатыстырмай, жүйелі дайындыққа басымдық беру қажет деп санайды.
«Енді дәл қазіргі құраммен Лос-Анджелес Олимпиадасына біздің команда дайын деп есептеймін. Әсіресе Асылбек Оразқұлов пен Сабыржан Аққалықов сияқты боксшылар нағыз Олимпиадада ел намысын қорғайтын жігіттер. Алайда оларға тиянақты әрі жүйелі оқу-жаттығу жиындарын өткізген абзал. Сонымен қатар оқу-жаттығу жиындарын тым көп ұйымдастырып, спортшыларды зорықтырып алмаған жөн.
Боксшылар да адам. Оларды қайта-қайта әр жарысқа сала беруге болмайды. Өзге де екінші және үшінші құрамдағы боксшыларды сынап көрсін. Себебі олардың арасынан да жарып шығатын спортшылар болуы мүмкін», — деді Тұрсынғали Еділов.
Маман ұлттық құрамадағы тәжірибелі спортшылар мен жас боксшылардың арасындағы сабақтастыққа да тоқталды.
«Жігіттердің көзіндегі отты өшірмей, керісінше жаға білетін бапкерлер болса, біздің боксшылар Олимпиадада озып шығатыны анық. Себебі құрамада екі дүркін әлем чемпиондары да жүр. Бұл — тәжірибелі, толысқан команда. Сонымен қатар араларында жасы келген боксшылар да бар.
Егер Олимпиадада жақсы нәтиже көрсете алмаса, құраманы жаңартып, жастардан жасақтаған дұрыс», — деді Тұрсынғали Еділов.
Фото: Olympic.kz.
