Қазақ футболы құрдымға кетіп, түбіне тірелді ме десем. Жоқ. Одан сайын тесіп жатыр. Бірер ай бұрын австралиялық Скотт Манды әкеліп, Қазақстан футбол федерациясының бас хатшысы қылып еді.
Бұл әрі ойланып, бері ойланып, біздегі футбол трансляциясын халыққа ақылы қылу туралы шешім шығарыпты.
«Қазақтар әбден тегін нәрсеге үйренген» — деп қояды.
Әй, Скотт, бізде онсыз да футбол халықтың ақшасына өмір сүріп жатыр. Бұған дейін жылына 30 миллиардттан аса қаржы бөлініп келген. Биыл да 30 миллиардттан аса қаржы бюджеттен бөлінді. Оның үстіне футбол көргеніміз үшін тағы қалтамыздан қаржы қаққың келе ме? Керісінше, бізде футбол көргендерге рахмет айтып, моральдық шығын төлеулелерің керек. Өйткені, ҚПЛ-ды тамашалау қаншалықты стресс пен депрессия екенін білесің бе?
Мен қазір туған жерің Австралияға не жұмыс жасаған Англияға барып, осындай ақыл айтсам, шәпкемді қайырып, атқа теріс отырғыз жібереді ғой. Сенің бұған дейін көрген елдеріңде футболға бюджеттен бір теңге де бөліндейді. Сәйкесінше, әр клуб өзінше «выживать» етеді. Ал, біздегі жағдай керісінше. Тіпті, сенің келуің, жүріп-тұруың, жалақы-сыйақыңды да тексеру керек. Ол да халықтың аузынан жырып алынуы әбден мүмкін.
Еуропадағыдай футбол қылғың келсе, төрешілік жүйені ретте, көрсетілім сапасын жақсарт, алаңның арғы жағындағы жемқорлықты жой! Кландардың соғысын тоқтат! Мүдделердің қайшылығын кес! Сосын барып, ақша туралы сөйлесейік. Ә дегеннен қарапайым халықтың аузын ұрам деп ойлама! Онсыз да мардымсыз жалақы мен қаптаған айыппұлдан аузымыз ұрылған. Ашуға тимей, нақты іспен айналыс! Қолыңнан ештеңе келмесе, үйіңе қайт!
Пікір иесі: Аслан Каженов.
Фото: ҚФФ.
