Қазақстан құрамасы мен «Семей» футзал клубының қақпашысы Лео Игита футзалдың қаржылық жағы және спорттық мансабын аяқтағаннан кейінгі жоспарлары туралы айтты, деп хабарлайды ASnews.kz.
«Мен жоғары жалақыны ұзақ уақыт бойы алған жоқпын, өйткені «Қайратқа» жас кезде келдім. Бірден бес жылдық келісімшартқа отырдым. Егер ол шаққа қайта оралу мүмкіндігі болса, мен мұны жасамас едім (күледі). Осы бес жылда жалақыда өсім болды, бірақ соншалықты үлкен емес. Мен – тәрбиелі адаммын. Егер келісімшартқа қол қойсам, оны соңына дейін орындаймын. Есікті үнемі қағып, жалақыны өсіруді сұрап жүрген жоқпын. Олай жасайтын ойыншылар да бар. «Қайраттағы» бес жылдан кейін олар менің рөлімді түсініп, шынымен де көмектесті. Олар менің командаға қаншалықты күш салғанымды көрді әрі инвестиция мен болашақ туралы ойлана бастады.
Футзал – бұл үлкен футбол емес. Үлкен футболда жоғары деңгейде қақпаға дәл соққы жасасаң болды – арқаң кеңге батып, миллиардер боласың (күледі). Бірақ, әрине, басқа жағы да бар: футболшылар 20 жыл бойы тер төгіп, сонда да өмір бойына жетерлік қаржы жинай алмайды. Жоғары деңгейде, әрине, бәрі басқаша. Екі жақсы соққы жасасаң – 2–3 жылға келісімшарт алып, өміріңе жететін миллиардерге айналасың. Тіпті уайымсыз өмір сүруге болады.
Футзалда тұрақты ойнап жүргенде қаржы жинауға болады. Егер мансабымды дәл қазір аяқтасам, өмір сүруге болады, бірақ шығындарды азайтуға тура келеді. Сол себепті мансабымды аяқтаған соң жұмыс істеуге тура келеді. Кейін жұмыс істеуді жоспарлап отырмын», – деді қақпашы InSport сайтына берген сұхбатында.
Лео Игита (Леонардо де Мело Виейра Лейте) – футзалдан Қазақстан ұлттық құрамасының аңызға айналған қақпашысы. 2024 жылдың шілдесінде ол АФК «Қайрат» сапындағы көпжылдық дәуірін аяқтап, «Семейге» ауысты. Алматылық клубта өнер көрсеткен жылдары ол екі УЕФА Кубогын қоса алғанда, 39 жүлде жеңіп алды. Қазақстан құрамасымен бірге Игита 2016 жылғы Еуропа чемпионатының қола жүлдегері атанып, 2021 жылғы әлем чемпионатының жартылай финалына дейін жеткен. Сонымен қатар Игита Futsalplanet Awards нұсқасы бойынша рекордтық бес рет әлемнің ең үздік қақпашысы атанды (2015, 2016, 2018, 2019, 2020).
Фотода: Лео Игита.
