Еркін күрестен Ресей чемпионаты аяқталды. Биылғы жарыстың басты жаңалығы – дағыстандық балуандар рекордтық деңгейде алтын медаль жеңіп, өз көрсеткішін жақсартып алды, деп жазады 1bol.kz.
Айта кету керек, былтырғы ел біріншілігінде 10 салмақ дәрежесінің сегізінде Дағыстан өкілдері жеңіс тұғырына көтерілген. Биыл олар тоғыз салмақта финалға шығып, бәрінде де топ жарды.
Ең тартысты белдесу 97 кг салмақ дәрежесінде өрбіген. Еуропа чемпионы Магомед Курбанов өз жерлесі Мухамед-Тахир Ханиевпен күресіп, есеп 4:4 болып аяқталды. Соңғы әдісті Курбанов жасағандықтан жеңіс де соған берілді.
Жалпы, финалда белдескен жиырма балуанның 14-і Дағыстан күрес мектебінің өкілдері. Олар бұл чемпионатта барлығы 20 медаль жеңіп алды: 9 алтын, 5 күміс және 6 қола медаль.
Фото: Ресей күрес федерациясы.
