Түркістандық «Тұран» Қазақстан Премьер-лигасына мерзімінен бұрын оралады, деп хабарлайды penalty.kz.
«Тұранның» жолдамасын бекіткен матч
Бірінші лиганың 24-турында қарағандылық «Шахтер» өз алаңында шымкенттік «Академия Оңтүстікті» 2:0 есебімен жеңді. Кездесуде Артем Литош дубль жасап, 50-ші және 79-минуттарда мергендігімен көзге түсті.
Бұл нәтиже «Тұранның» Премьер-лигаға шығуын қамтамасыз етті. Түркістандық команданың ең жақын бәсекелесі енді оны ұпай саны бойынша қуып жете алмайды.
«Академия Оңтүстіктің» мүмкіндігі неге қалмады?
Шымкенттік клуб 24 матчтан кейін 43 ұпаймен төртінші орында тұр. Команданың маусым соңына дейін өткізетін екі кездесуі қалды. Екеуінде де жеңіске жеткен күннің өзінде, ұпайы 49-дан аспайды.
Ал үшінші сатыдағы «Тұран» 23 ойында 50 ұпай жинаған. Сондықтан түркістандықтар қалған матчтардың нәтижесіне қарамастан, жоғары дивизионға жолдама алды.
«Қайрат-Жастар» ҚПЛ-ға көтеріле алмайды
Турнир кестесінде 56 ұпай жинаған «Қайрат-Жастар» екінші орында келеді. Бірақ алматылық «Қайраттың» фарм-клубы болғандықтан команда Қазақстан Премьер-лигасына көтерілу құқығына ие емес.
Осылайша «Тұран» – ҚПЛ-2027 маусымына жолдама алған екінші клуб. Бұған дейін қарағандылық «Шахтер» де элитаға оралуын мерзімінен бұрын қамтамасыз еткен еді.
Фото: instagram.com/fc.turan.
