Лондондық «Челси» 23 жастағы шабуылшысы Лиам Делапты осы жазда сатуға дайын. CaughtOffside және iNews басылымдарының мәліметінше, «көктер» футболшыны 40 миллион фунт стерлингке бағалап отыр, деп жазады asnews.kz.
Оны өз қатарында көруге «Ноттингем Форесттің» жаңа бас бапкері Оливер Гласнер басты үміткер болып отыр. Сонымен қатар, форвардқа «Лидс Юнайтед», «Эвертон» және «Манчестер Юнайтед» де қызығушылық танытуда.
Делаптың сәтсіз маусымы
Делап өткен маусымда «Ипсвич Тауннан» үлкен үмітпен ауысқанымен, Стэмфорд Бриджте өзін көрсете алмады. АПЛ-дың 28 матчында бары-жоғы бір гол соққан шабуылшы лондондық клубтың сенімін ақтай алмады. Осыған байланысты «Челси» бапкерлік штабы тәжірибелі Дэнни Уэлбек сияқты ойыншыларды қарастырып, Делапты босатуды ұйғарған.
Жанкүйерлер не дейді: Сәтпаевқа жол ашыла ма?
Бұл трансфер жаңалығы лондондық клуб жанкүйерлері арасында қызу талқылануда. Танымал форумдар мен әлеуметтік желілерде жанкүйерлер Делаптың, сондай-ақ Марк Гиу немесе Николас Джексонның кеткені «Челси» академиясы мен жастар жүйесіндегі басты дарындарға жол ашатынын айтуда.
Солардың бірі – лондондықтардың назарына ілігіп, жанкүйерлер аузында жүрген қазақстандық жас дарын Дастан Сәтпаев. Мета-талқылауларда жанкүйерлер Сәтпаев сияқты жас әрі потенциалы жоғары шабуылшыларға негізгі құрамнан орын босату керек екенін жарыса жазуда.
«Делаптың Стэмфорд Бриджте жолы болмады, оның кеткені өзіне де дұрыс. Гиу мен Джексонға да орын босату керек, себебі бізде Дастан сияқты жас әрі талантты ойыншылар өсіп келеді», – деп жазды бір жанкүйер.
Еске сала кетейік, 17 жастағы қазақстандық шабуылшы Дастан Сәтпаев «Челсидің» Аустралия мен Азиядағы маусымалды турнесі аясында «Вестерн Сидней Уондерерске» қарсы кездесуде негізгі құрамда алаңға шығып, дебют жасаған болатын.
Қазақстандық футболшы ойынның 6-минутында-ақ Райан Кавума-Маккуиннің нәтижелі пасынан кейін қақпашымен бірге-бір шығып, «көктер» сапындағы алғашқы голын соқты.
Лондондық клуб жанкүйерлері жас дарынның ойынына тәнті болып, әлеуметтік желілерде таңданыстарын жарыса жазды. Ал Сәтпаевтың алғашқы голы түсірілген видео «Челсидің» ресми парақшаларында соңғы жылдардағы ең көп қаралым жинаған медиа-посттардың біріне айналды.
Фотода: Дастан Сәтпаев.
