Дереккөздің мәліметінше, 17 жастағы шабуылшының ойынын Еуропаның бірнеше жетекші клубы бақылаған. Олардың қатарында әлемдегі ең атақты командалардың бірі саналатын мадридтік «Реал» да болған.
Басылымның жазуынша, қазіргі таңда «Челсиді» жаттықтырып жүрген Хаби Алонсо қазақстандық футболшыны алғаш рет 2025 жылдың қыркүйегінде байқапты. Ол кезде испаниялық маман мадридтік клуб жүйесінде жұмыс істеген және Чемпиондар лигасы аясында Алматыда өткен «Қайрат» пен «Реал» арасындағы матчта Сәтпаевтың өнерін өз көзімен көрген.
Кездесуден кейін Алонсо «Қайрат» президенті Қайрат Боранбаевпен және бас бапкер Рафаэль Оразбахтинмен әңгімелескен. Боранбаевтың айтуынша, испаниялық маман «Реалдың» да Сәтпаевты бақылауда ұстағанын мойындаған.
Алайда қазақстандық шабуылшы үшін күресте «Челси» басым түсті. Лондон клубы 2025 жылдың ақпан айында футболшыны шамамен 3,5 миллион фунт стерлингке сатып алу жөнінде алдын ала келісім жасаған болатын.
Дастан Сәтпаев 12 тамызда кәмелет жасына толған соң ресми түрде «Челси» ойыншысы атанады. Сонымен қатар Daily Mail мәліметінше, қазақстандық футболшы келесі аптада-ақ Лондонға барып, команданың маусым алдындағы дайындығына қатысады.
Осылайша Сәтпаев Еуропаның ең беделді клубтарының назарын аударған алғашқы қазақстандық футболшылардың бірі ретінде жаңа белеске қадам басқалы отыр.
Фото: ҚФФ.
