Шахматшы бұл туралы Telegram-арнасында жариялаған жазбасында айтып, соңғы күндері өзіне бағытталған сын-пікірлерге жауап берді.
Асаубаеваның сөзінше, ол 12 мен 15 жас аралығында Ресейдің атынан халықаралық жарыстарға қатысқанымен, Қазақстан азаматтығынан ешқашан бас тартпаған. Спортшының айтуынша, сол кездегі шешімге қаржылық қолдау емес, оның кәсіби дамуына кедергі келтірген отбасылық жағдайлар себеп болған.
«Мен бала кезімде, 12 жастан 15 жасқа дейін Ресей атынан өнер көрсеттім. Бірақ Қазақстанға 2019 жылы, кейінгі саяси оқиғаларға дейін оралдым. Спорттық азаматтықты ауыстыруымның себебі қаржыландыру мәселесі емес еді. Менің дамуыма кедергі келтіріп, түрлі қиындықтар туғызған туған ағам болды. Ол қызметінен кеткеннен кейін Қазақстанға қайта оралып, бұл туралы ашық айттық», – деп жазды шахматшы.
Сонымен қатар әлемдік шахмат аренасында Қазақстанның намысын қорғап жүрген спортшы бұл мәселе төңірегінде айтылып жатқан пікірлердің басым бөлігі шынайы жағдайды толық білмей жасалып жатқанын атап өтті.
Бұдан бөлек, Асаубаева әлеуметтік желідегі парақшасында ұйымдасқан түрде жазылып жатқан пікірлерге де назар аударды. Оның пікірінше, өз жазбаларының астында белсенділік танытып жүргендердің арасында боттар болуы мүмкін.
Сондай-ақ ол Қазақстанның Туризм және спорт министрлігінің ұстанымына қатысты сын айтып, шахматтың ел үшін маңызын төмендетуге болмайтынын жеткізді.
Фото: әлеуметтік желілен.
