Қазақстан құрамасы мен грозныйлық «Ахмат» жейдесін киген жартылай қорғаушы Ғалымжан Кенжебектің жаңа клубтағы жалақысы белгілі болды, деп жазады aladop.kz.
22 жастағы футболшының жаңа ұжымдағы еңбекақысы бұрынғы келісімшартындағы сомадан 5 есе артық болады деп жазылып жүр. Ал Ғалымжан Кенжебек осыған дейін «Елімай» намысын қорғады. Онда, клубтағы дереккөздің сендіруінше, футболшының айлық ақысы шамамен 2-3 миллион теңгенің аралығында болған. Осыдан келе, қазақстандық футболшының Грозныйдағы табысын 10-15 миллион теңге аралығында деп болжауға болады. Әрине, қолымызда нақты келісімшартта көрсетілген цифрлар жоқ, дегенмен осы соманың айналасында болып қалуы ықтимал.
Айта кетейік, Ғалымжан Кенжебек «Ахматпен» 4 жылдық келісімшартқа отырады деп күтілуде. Отандасымыз жаңа жылдан кейін тиісті рәсімнің барлығын өткізіп, ресми түрде жаңа командасына қосылмақ. Ғалымжан Кенжебек «Қайрат» түлегі – одан бөлек «Жеңіс», «Елімай», «Кошице» (Словакия) сынды клубтарда доп тепкен. Футболшының нарықтық бағасы 600 мың еуро.
Фотода: Ғалымжан Кенжебек.
