Кубалық әлем чемпионы Эрисланди Лара (32-3-3, 19 КО) Жәнібек Әлімханұлының допинг дауына байланысты тоқтаған жекпе-жектен кейін де үлкен айқастан тыс қалмайды, деп жазады penalty.kz.
«Лара әлі бір үлкен гонорарлы жекпе-жекке лайық»
Boxingscene.com сайтының журналисі Лукас Кетельдің жазуынша, Лараның соңғы жекпе-жегі кейбір әлсіз тұстарын көрсеткенімен оның аты әлі де үлкен айқастарға сұранысқа ие.
«Гонсалеспен болған жекпе-жекте Лара әлсіз жақтарын көрсетті, бірақ оның аты мықты брендке айналып үлгерді. Сол себепті оған кем дегенде тағы бір ірі жекпе-жек пен үлкен гонорар қамтамасыз етілуі тиіс», – деп жазады журналист.
Ол Лараға қарсы ұйымдастыруға болатын бірқатар нұсқаны атап өтеді.
Лараның мүмкін қарсыластары: жастарға қарсы тәжірибе
Boxingscene.com шолушысы Эрисланди Лараның келесі қарсыластары ретінде мына боксшыларды атайды:
- Йоэнли Эрнандес – WBA рейтингі бойынша бірінші орында тұрған жас талант, дәл осы ұйымның чемпионы Лара;
- Хесус Рамос-джуниор – әлеуеті жоғары америкалық үміткер;
- Трой Айсли – қарқыны жоғары жас боксшы;
- Аарон Маккенна – кәсіби рекорды әсерлі, өрлеп келе жатқан файтер.
Журналистің ойынша, Лараның мансабындағы соңғы кезең осы жас боксшыларға қарсы айқастармен байланысты болуы мүмкін:
«Лара үшін финалдық кезең – жасы өзінен екі есе кіші дерлік қарсыластарға қарсы айқастар. Олар осы спортта құрметке ие болу үшін оның есімін «баспалдақ» ретінде пайдаланғысы келеді», – деп түйіндейді автор.
Гонсалеске қарсы жеңіс және Әлімханұлының допинг дауы
Эрисланди Лара рингке соңғы рет венесуэлалық Хоан Гонсалеспен (36-5, 34 КО) шыққан. Кубалық боксшы бұл жекпе-жекте сенімді жеңіске жеткен.
Ал бастапқы жоспар бойынша Лараның келесі қарсыласы Қазақстан боксшысы Жәнібек Әлімханұлы (17-0, 12 КО) болуы тиіс еді. Алайда Әлімханұлының допинг-тестінің оң нәтиже көрсетуіне байланысты бұл айқас жойылып, жекпе-жек ресми түрде бұзылған деп жарияланды.
Фото: football24.ua.
