Андрей Демченко маусымның ортасында келсе де, жыл соңында үздік бапкерлер санатына енген болатын, деп жазады penalty.kz.
Астана қаласының «Жеңіс» клубы украиналық маман Андрей Демченконың бас бапкер қызметінен кеткенін жариялады.
« „Жеңіс“ футбол клубы бас бапкеріміз Андрей Демченконың келісімшарт мерзімі аяқталғанын хабарлайды», — делінген ресми мәлімдемеде.
Демченко Қазақстан Премьер-Лигасы-2025 маусымының ортасында «Жеңіске» келіп, 12 матчта бірде-бір жеңіске жете алмаған грек маманы Акис Вавалис пен Пиралы Әлиевтің орнын басты. Украиналық бапкердің жетекшілігімен команда 14 ойында сегіз жеңіске жетіп, бес рет тең түсіп, бір рет жеңілді. Сонымен қатар клуб Қазақстан кубогының жартылай финалына дейін жетті.
БАҚ мәліметінше, елордалық клубтың жаңа бас бапкері ретінде бұған дейін Қазақстан құрамасында жұмыс істеген Әли Әлиевтің келуі күтілуде.
