Лондондықтар 17 жастағы қазақстандық шабуылшыны келешекте клубтың негізгі құрамына бірден енгізуді жоспарлап отыр, деп жазады penalty.kz.
Екі жылдан кейін Джексоннан да мықты бола ала ма?
ChelseaNews.Ru басылымның пікірінше, «Қайрат» тәрбиеленушісі Дастан Сәтпаевтың әлеуеті өте жоғары. Материалда былай делінеді:
«Қазірдің өзінде екі жылдан кейін Дастан Сәтпаев «Челси» сапында екі маусым өнер көрсеткен Николас Джексоннан озып кетуі әбден мүмкін деген әңгіме жүр».
Яғни, 17 жастағы қазақстандық легионерге Лондонда кәдімгідей үміт артып отыр.
«Челси» қазақстандық форвардты жалға жібермей, өз қатарында ұстамақ
Клуб Сәтпаевты бірден жүйеге қосу арқылы оны жалға бермеуді көздеп отыр:
«Жоспарда „Челси“ жас форвардты басқа клубқа арендаға жібермейді, қайта оны бірінші командаға біртіндеп енгізуге тырысады», – деп жазады басылым.
Орталық шабуылда үлкен бәсеке: Делап, Жоау Педру, Эмега
Соған қарамастан Сәтпаевты оңай маусым күтіп тұрған жоқ. «Челсидің» орталық шабуыл шебіндегі бәсеке өте жоғары болып қала бермек.
Қазірдің өзінде лондондық клубтың шабуыл шебінде Лиам Делап пен Жоау Педру бар. Ал жақын уақытта «Страсбурден» Эмануэль Эмега да келмек.
Сол себепті қазақстандық ойыншыға Стэмфорд Бриджде өз орнын табу үшін жоғары деңгейде өзін көрсетіп, әр мүмкіндікті тиімді пайдалануға тура келеді.
Трансфердің шарттары: «Қайраттан» – «Челсиге»
Еске салайық, 2025 жылғы ақпанда алматылық «Кайрат» клубы Дастан Сәтпаевтың трансфері бойынша «Челсимен» ресми келісімге келгенін жариялаған еді.
Келісім-шарт шартына сай Дастан Сәтпаев 2026 жылы кәмелет жасқа толғаннан кейін ресми түрде «Челси» сапына қосылады.
Фото: instagram/@f.c.kairat.
