Волейболдан әйелдердің ұлттық лига командалары арасында ХХХIV Қазақстан чемпионатында Талдықорғанның «Жетісу» командасы жеке-дара көш бастап келеді.
Талдықорған қаласындағы екінші турда жексенбі күні орталық матчта «Жетісу» мен «Қуаныш» (СҚО) командалары өзара мықтыны анықтады.
Алғашқы екі партияны Юрий Панченко жаттықтыратын солтүстікқазақстандықтар өз есебіне жазды – 25:23, 25:19. Алайда бұдан кейін сербиялық Марко Гршичтің шәкірттері өз алаңында жанкүйерлерді жерге қаратпай, камбэк жасай білді – 25:21, 25:23, 15:11. Қорытынды есеп – 3:2.
«Жетісу» сапындағы ресейлік легионер Мария Фролова ойын туралы өз пікірін білдірді.
— Бастапқы екі партия ойдағыдай болмады. Дегенмен екінші сеттің өзінде ұтатынымызға сендім. Содан кейін жинала біліп, командалық ойын нәтижесінде жеңіске жеттік. Бізді қолдаған жанкүйерлерімізге алғысымызды айтамыз, — деді М.Фролова.
Осылайша, қатарынан 14 кездесуін ұтыспен аяқтаған талдықорғандықтар ұпай санын 40-қа жеткізіп, жаңа маусымда да чемпиондықтан басты үміткер екендіктерін байқатты.
«Қуаныш» 36 ұпаймен екінші орында қалды. 2025 жылғы күміс жүлдегер «Берел» (Өскемен) 31 ұпаймен үздік үштікті түйіндеп тұр.
Фото: vc_zhetysu.
