Қазақстан құрамасының және Семейдің «Елімай» клубының шабуыл шебінің ойыншысына Түркия Суперлигасының екі клубы қызығушылық білдіре бастады, деп жазады Аладоп.kz.
Футбол сарапшыларының айтуынша, соңғы жылдары Қазақстандық футболшылардың деңгейі айтарлықтай өскен. Осы жаңа буынның жарқын өкілі – Ғалымжан Кенжебек. Ол шабуылдағы жылдамдығымен, дриблинг шеберлігімен және шешуші сәттерде нәтижелі ойынымен көзге түсіп жүр.
Биыл шілде айында Кенжебек Словакияның «Кошице» клубынан Семейдің «Елімайына» ауысқан болатын. Жаңа клубында ол небәрі бірнеше айдың ішінде негізгі ойыншыға айналды. Қазақстан Премьер лигасында 11 матч өткізіп, 6 гол соғып, 4 нәтижелі пас берді.
Сонымен қатар, Ұлттық құраманың сапында 2026 жылғы Әлем чемпионатының іріктеу ойынында Лихтенштейнге қарсы кездесуде (4:0) екі гол және бір ассист жасап, жанкүйерлер мен сарапшылардың жоғары бағасына ие болды.
Футбол әлеміндегі пікірлерге сүйенсек, Кенжебек үшін Түркия Суперлигасына ауысу – мансабындағы маңызды қадам болмақ. Ол өз талантын Еуропаның беделді чемпионаттарының бірінде дәлелдеуге дайын екендігін әлдеқашан көрсеткен.
