Қазақстандағы жағдай
Депутаттың айтуынша, халықаралық Sportradar деректеріне сәйкес, 2022 жылы Қазақстан әлем бойынша келісілген матчтар саны бойынша төртінші орынға шыққан.
– Бұл Қазақстан футболында әділетсіз ойындардың кең таралғанын және ресми түрде мойындалғанын көрсетеді. Қазақстан футбол федерациясының президенті Марат Омаров мәселенің бар екенін мойындағанымен, оны жүйелі шешу бойынша нақты шаралар қабылданбады. Қоғамдық ұйымдар мен БАҚ букмекерлік кеңселердің көптеген матчтарды желіден алып тастағанын тіркеп отыр, – деді Құспан.
Халықаралық тәжірибе
Депутат мұндай істердің әлемде қатаң жазаланатынын еске салды:
- Германияда 2005 жылы төреші келісілген матчтар үшін 2 жыл 5 айға сотталды.
- Оңтүстік Кореяда 2011 жылы 57 ойыншы айыпталып, көпшілігі жазаға тартылды.
- Италияда 2015 жылы клуб президенті және ондаған адам сотқа тартылып, команда еурокубоктардан шеттетілді.
Тергеу қажеттілігі
Құспанның айтуынша, келісілген матчтар тек спорттағы әділетсіздік емес, сонымен қатар мыңдаған азаматтарға қарсы қаржылық алаяқтықтың түрі болып табылады.
– Футбол тек спорт саласымен шектелмейді. Қазіргі таңда құқық қорғау органдары көбіне мемлекеттік органдардағы заңбұзушылықтарға назар аударып отыр. Алайда квазимемлекеттік секторларда, коммерциялық және мемлекеттік емес құрылымдарда миллиондаған, миллиардтаған теңгеге жететін қаржылық махинациялар жасалып жатыр. Бұл бақылаудың әлсіздігі азаматтардың сенімін жоғалтып қана қоймай, ел экономикасының тұрақтылығына да қауіп төндіреді, – деді депутат.
Осыған байланысты ол құқық қорғау органдарын тарта отырып, Қазақстан футболындағы келісілген матчтарға қатысты тергеу жүргізуді ұйымдастыруды ұсынды.
Фото: Парламент Мәжілісі.
