Жаңа маусымға дайындық аясында «Барыс» хоккей клубы Астанада Ресейдің «Сибирь» (Новосібір) командасымен алғашқы бақылау ойынын өткізді.
Кездесу барысында командалар бастапқы минуттан тартысты ойын өткізді. Дегенмен бірінші кезеңде таблодағы есепке өзгеріс енген жоқ.
Екінші кезеңді қазақстандық команда белсенді бастады. Нәтижесінде 22-минутта «Барыс» сапынан Кирилл Савицкий әріптесі Әлихан Өмірбековтің пасын шебер пайдаланып, команданы алға шығарды. Одан кейін 22-минутта Джейк Масси елордалық клубтың басымдығын арттырды.
Оған 29-минутта «Сибирь» құрамынан Скотт Уилсон бір голмен жауап қайырса, 58-минутта «Барыс» шабуылшысы Әлихан Әсетов қорытынды есепті белгіледі. Осылайша елордалық клуб қарсыласынан 3:1 есебімен басым түсті.
Енді екі команда арасындағы тағы бір ойын 2 қыркүйекте 18:00-ге белгіленген.
Қазақстандық клуб Құрлықтық хоккей лигасындағы жаңа маусымда алғашқы үш ойынды елордада өткізеді. Алдымен 7 қыркүйекте Ресейдің «Трактор» (Челябинск) командасымен кездессе, одан кейін 9 қыркүйекте «Амур» (Хабаровск), 13 қыркүйекте Беларусьтің «Динамо» (Минск) клубтарымен шеберлік байқасады.
Айта кетсек, биыл елордалық клубпен АҚШ хоккейшілері Иэн Маккош, Майкл Веккьоне, Райли Уолш, Тайс Томпсон, канадалық Джейк Масси, ресейлік Владимир Волков, Эмиль Галимов, қазақстандық Кирилл Панюков, Кирилл Савицкий, Батырлан Мұратов, Роман Старченко және өзге де ойыншылар келісімшартқа қол қойды.
Фото: hcbarys.kz.
