Weszlo.com порталы мақаласына «Матч сәтсіз өтсе де, келесі кезеңге жолдама алдық» деген атау берген. Автордың айтуынша, «Легия» үшін Ақтөбедегі кездесу оңай соқпаған. Қазақстандық клуб Кацпер Тобиаш қорғаған қақпа маңында жиі қауіп тудырғанын, тиісінше «Легия» қорғаушылары біраз қиналғанын атап өтті. Соңғы минутта Юрген Элитим соққан гол ғана ойын тағдырын шешкен.
Kanal Sportowy сайты да матчтың қиын болғанын атап, «Легия» Еуропа лигасының екінші кезеңіне әрең өтті» деп жазды. Олар «Ақтөбенің» бірнеше сәтте есеп ашуға жақын болғанын, ал «Легияның» шабуылы әлсіз, ойыны сенімсіз болғанын сынады.
Sportowefakty порталы «Ақтөбе – Легия» матчының тағдырын соңғы минуттар шешті» деп қысқа да нұсқа жазған. Журналистер Варшавадағы кездесуде алаңға шықпаған «Ақтөбенің» негізгі ойыншылары – Артур Шушеначев пен Георгий Жуковтың бұл жолы ойынға айтарлықтай серпін бергенін атап өтті.
Przegląd Sportowy басылымы матчқа көңілі толмай, мақалаға «Жеңіс – жалғыз плюс» деп атау берген. Автор алыс жол мен ауа райын ескергенімен, «Легияның» қағаз жүзінде әлдеқайда мықты ұжым екенін алға тартып, дәл бұлай қиналуы орынсыз екенін жеткізді. Тіпті бұған дейін Польша чемпионатында аса бір көзге түспеген Жуковтың да бұл ойында көсіле шапқаны айтылған.
Sport.pl «Ерекше «көрініс» басталып еді, 91-минутта ойын бітіп қалды» деп командасын шымшып өткен. Олар шабуыл шебі әлсіз, қорғаныстағы жұмысі жүйесіз болғанын сынаған. Бұған матчтың қызықсыз өткенін және «Легия» жанкүйерлерінің ренжігенін қосқан.
Rzeczpospolita порталы эмоция мен нәтижені қатар қойып, мақаласына «Легияның» Қазақстандағы азабы» деген тақырып берген. Олар бас бапкер Эдвард Йорданескудің сөзін келтіріп: «1:0 есебімен жеңіске жеткенімізге ризамын. Бүгін ойынды бақылауда ұстауға тырыстық. Нәтиже маңызды», – деп түйіндеген.
Фото: instagram.com/fcaktobe_official.
