Сәкеннің кешегі жекпе-жегі Хасанбоймен ұрысының алдындағы генеральный репетиция іспетті болды. Және Сәкен сол репетициядан сүрінбей өтті.
Түрік боксшысы Самет Гумуш осал қарсылас емес. Еуропа чемпионы. Әрі ұрыс мәнері Хасанбойға ұқсас. Қоян-қолтық айқасқа бейім.
Сәкеннің сенгені ұзын қолдары мен жылдам аяқтары.
Кеше Сәкен алғашқы екі раундта сол мүмкіндігін жақсы пайдаланды.
Үшінші раундта жүрісінен жаңылған жорғадай кібіртіктеп қалған кездері болды. Кездесуден кейін берген сұқбатында Сәкеннің өзі:
«Үшінші раундта аяқпен жұмыс істеу жағынан сәл кемшілік кетті», – деді.
Ал, кәсіпқой бокстың дәмін татып көрген Хасанбой Досматов әуеской рингтің хас шебері – «сәл кемшіліктің» өзін кешірмейтін боксшы…
«Келесі кездесуімде ондай болмашы қателіктерді қайталамауға тырысамын. Шаршы алаңда аянып қалмаймын. Соңғы демім қалғанша жұдырықтасамын», – деді Бибосынов батыр.
Ер екі сөйлемейтін болар. Сенейік, Сәкенге!
Сонымен 2 тамыз финалға бергісіз жекпе-жек, Бибосынов- Досматов дербиі…
Сегіз жылға созылған Сәкен мен Хасанбой текетіресі…
Хасанбой Токиодағы жеткен жетістігін қайталамақ. Сәкен Токиодағы кеткен есесін қайтармақ…
Нәтижесі қалай болмақ?! Сәкенімізге сәттілік тілей отырып, күтейік, ағайын!
Эль-классико…
Жазба авторы Мұрат Рақымжан.
