Қазақстандық теннисші, әлемнің 251-ракеткасы Бейбіт Жұқаев Уимблдон турнирінің іріктеу сайысын сәтті өткізіп жатыр, деп жазады 1bol.kz.
Ол бүгін екінші жеңісіне қол жеткізді. Отандасымыз іріктеудің жартылай финалында әлемнің 137-ракеткасы, германиялық Янник Ханфманмен кездескен. Жұқаев екі сетте 7:6 (9:7), 6:3 есебімен жеңіске жетті.
Қазақстандық енді іріктеу сайысының финалында әлемнің 239-теннисшісі франциялық Люка Павловичпен кездеседі. Егер қарсыласынан айласын асырып жатса, негізгі қатысушылардың қатарына қосыла алады.
Ал тағы бір қазақстандық Михаил Кукушкин (190-ракетка) рейтингіде өзінен төрт саты төмен тұрған даниялық Аугуст Хольмгренге жол берді — 6:4, 6:7 (4:7), 2:6. Тимофей Скатов (рейтингте 212-орында) болса, әлемнің 144-ракеткасы, бельгиялық Александр Блоксқа есе жіберді — 4:6, 5:7.
Фото: ҰОК.
