Әлемнің 86-ракеткасы, грек теннисшісі Мария Саккари Германияның Бад-Хомбург қаласында өтіп жатқан WTA-500 турнирінің бірінші айналымындағы матчтан кейін қазақстандық Юлия Путинцевамен (рейтингте 27-орында) болған жанжалға қатысты пікір білдірді, деп жазады 1bol.kz.
Бұл кездесуде Мария 7:5, 7:6 (8:6) есебімен Юлиядан басым түсті.
— Ол сені кешкі асқа шақырды ма, не болды өзі?
— Ол мені кешкі асқа шақырады деп ойламаймын. Шынымды айтсам, маған бәрібір. Керемет достарым бар, кешкі асты солармен ішемін. Бұл тақырыпты осымен жабайықшы. Мен оны ойыншы ретінде құрметтеймін, бары осы ғана, — деді Саккари корттағы сұхбат кезінде.
Еске сала кетейік, матч соңында теннисшілер бір-біріне қол бергенімен, Саккари Юлияға бірдеңе айтып, ал оған жауап ретінде Путинцева Марияның алдында тағзым еткен кейіп танытты. Осыдан соң Мария Юлияға жақындап, екеуінің сөзге келіп қалғанын көруге болады.
Фото: Championat.com.
