Кәсіпқой бокстан орта салмақта IBF/WBO тұжырымдары бойынша әлем чемпионы қазақстандық Жәнібек Әлімханұлы (17-0, 12 KO) жыл соңына дейін матч-реванш өткізуі мүмкін, деп жазады 1bol.kz.
Британиялық промоутер Фрэнк Уоррен (Queensberry) мен оның қарамағындағы боксшы Дензел Бентли (21-3-1, 17 KO) осындай талап қойып отыр.
«Жәнібек соңғы рет титулды ерікті түрде қорғады, ол Анауэль Нгамиссенгені 5-раундта техникалық нокаутпен жеңді. Енді міндетті қорғаныс өткізетін уақыт келді. Біз бұл шешімді WBO арқылы талап етеміз.
Дензел өз кезегін күтті, биыл бірде-бір жекпе-жек өткізген жоқ. Енді нақты мерзімін білуі керек. Біз ұзақ күтіп жүре алмаймыз. Жетер. Ол жыл соңына дейін чемпиондық белбеу үшін жұдырықтасуы керек», — деді Уоррен The Ring басылымына берген сұхбатында.
Айта кетейік, 2022 жылы Жәнібек Әлімханұлы Дензел Бентлимен жекпе-жек өткізіп, төрешілер шешімімен жеңіске жеткен.
Фото: Allboxing.
