Төрешіні айыптауға себеп те бар. Арбитр болған Сергей Ноженко «Қайсар» қақпасына 41-минутта бір пенальти белгілесе (Джеффри Чинеду гол соға алмады), 88-минутта екінші рет 11 метрлік айып нүктесін көрсетті. Алайда, бұл жолы да астаналықтар өз мүмкіндігін пайдалана алған жоқ. Назми Грипшидің тепкен добын қақпашы қайтарды. Бірақ, төрешінің бұған көңілі толмай, Грипшиге пенальтиді басынан тепкізіп, «Астана» ақыры есепті теңестірді. Қорытынды есеп – 1:1.
Осылайша, «Астананың» еншісінде 18 ұпай бар, олар көш бастап тұрған алматылық «Қайраттан» 2 ұпайға қалып келеді. Ал «Қайсар» 4 ұпаймен турнир кестесінің төменгі сатысында орналасқан.
Кездесуден соң «Қайсар» клубының бас бапкері Виктор Кумыков төрешілердің жұмысын сынға алып, қызылордалық ұжымды аяқтан шалуды доғаруды талап етті.
«Біздің команда қазақстандықтардан ғана жасақталғанын жақсы білесіздер. Жігіттер қосалқы құрамнан, Бірінші және Екінші лигалардан жиналған.
Мен онсыз да жарты жылға шартты түрде шеттетілгенмін, енді тағы шеттетілетін шығармын. Бірақ үнсіз отыра беруге де болмайды. Ойынымызға төреші болып тағайындалған әрбір төреші біздің команданың сағын сындыруды абырой санайтындай. «Қызылжармен» болған алдыңғы матчта 100 пайыз қызыл қағаз болған, алайда қызыл қағаз тұрмақ, ойынды тоқтатқан жоқ. Ал бізді бірден алаңнан қуушы еді. Үнемі қайталанатын жағдай. Бізді өлтіре берудің қажеті жоқ. Командамыз енді жасақталған. Соған қарамастан төрешілер қосымша аяқтан шалады. Бір ойында үш пенальтиді қалай беруге болады?!» — деп ашуға булықты Кумыков.
Фото: QFL.
