Шымкенттің «Ордабасы» футбол клубының басынан дау арылар емес. Жуырда ғана қала әкімі команда капитаны болған Асхат Тағыбергеннің ай сайын 20 млн теңге жалақы алып келгенін айтқан болатын. Енді қалалық прокуратураның мәліметінше, дәл осындай көлемдегі ақшаны клубтың жиырма ойыншысы ай сайын алып отырған, деп жазады 1bol.kz.
Шымкентке Ғабит Сыздықбеков әкім болып тағайындалғаннан кейін «Ордабасы» клубының шығындарына тексеріс жүргізілген болатын. Артынша, клубтың президенті Бауыржан Абдубаитов отставкаға кетті. Ал, арада бірнеше ай өткенде прокурорлар аса ірі көлемде қаржылық заң бұзушылықтардың болғанын айтып дабыл қағып отыр.
Атап айтқанда, клуб басшылары 2023/24 жылғы маусымда жиырма ойыншыға 2 млн теңге жалақы және ай сайын 18 млн теңгеге жуық бонус (сыйақы) төлеп келген. Сол жиырма ойыншының 12-сі – легионерлер. Оларға бір жылда төленген сома – 1 млрд 900 млн теңге.
Сол легионерлердің бірі – Артем Беседин. Онымен 247,5 млн теңгеге контракт жасалыпты. Осыншама ірі көлемде ақша алған Беседин бір маусымда небәрі тоғыз-ақ матчта алаңға шығып, соның тек біреуінде ғана 90 минут бойы ойнап берген.
Фото: Ордабасы ФК.
