Қазақстандық клубтар еуромаусым басталмай жатып, бірінен соң бірі жеңіліп жатыр. «Ақтөбе» командасы Конференциялар лигасының алғашқы іріктеу кезеңінде Боснияның “Сараевосынан” ұтылды. Өз алаңында ұтылды. «Тобыл» болса, Еуропа лигасының бірінші іріктеу кезеңінде Словакияның «Ружемберокына» жол берді. Оның алдында «Ордабасы» өз алаңында Молдованың «Петрокуб» командасын қабылдап, қарсыластар қақпасына бірде-бір гол соға алмады. Масқара. Өте ұят жағдай.
Қазақстандық клубтарда қаптаған легионер. Матчтың суреттерінен бір қаракөзді таппадым. Қазақ ойыншылары қайда? Маусым басталмай жатып, келімсектерге шектеуді алып тастадыңдар. Қарсы болдық. Сонда не дедіңдер? «Ертең еурокубокта көресің. Барлығын қырамыз, жоямыз» дедіңдер. Қайда енді? Ә дегеннен айырылып жатсыңдар. Бірінші айналымнан-ақ баспен қадалдыңдар. Шымкентте де, Ақтөбеде де стадионға ондаған мың жанкүйер жиналды. Жүздеген мың адам тікелей эфир арқылы көрді. Солардың көз алдында позор болдыңдар.
Плюс халықтың ақшасын ауаға шашып жатсыңдар. Сол клубтарға, әсіресе, легионерлер жалақысына миллиардтаған ақша бөлінеді. Бюджеттің ақшасы. Жергілікті спортты дамытуға, оның ішінде жасыл алаңдар салып, балалар футболын қолдауға арналған ақша ғой негізі. Соны мыналарға беріп жатсыңдар. Әлгі «Петрокуб» намысын қорғайтын Хынчешты қаласында бар-жоғы 12 мың адам тұрады. Бәрі әуесқой ойыншылар. Сөйте тұра олар мемлекеттен бір еуро да алмайды. Керісінше, миллиондап салық төлейді. Ал, не дейсіңдер?
Біздегі футболды жазатын әріптестер де артты ашытады. Күнделікті басқа елдердің клубтарын талқылап, дымдарың қалмай жатады. Месси мен Роналду болып екіге бөлініп, бір-біріңмен қырықпышақ болуға дайынсыңдар. Отандық командаларды неге солай айтпасқа? Неге барлығымыз бірге талап етпеске? Кімнен қорқасыңдар? Ұлттық құраманың түрі анау. Өзіміздің мамандарды сырып тастап, қайдағы бір Черчесовқа тізгінді бердік. Клубардың түрі мынау. Өзіміздің ойыншыларды сырып тастап, қайдағы бір келімсектерге мүмкіндік бердік. Уже біраз нәрсе жоғалттық. Мүлде ештеңесіз қалмай тұрып, мемлекеттен ақша бөлуді доғарайық. Шетелден споршы әкелуді тоқтатайық. Басы-қасындағы мамандарды ауыстырып, футболға жүйелі реформа жасайық. Қыртқан жүріс пен өтірік уәдені қойып, нақты іске көшейік…
Спорт журналисі Аслан Каженовтың жазбасынан.
