«Металлист 1925» клубы мен украиналық дзюдошы Дарья Билодид арасындағы ынтымақтастық жаңа деңгейге көтеріледі. Әлем және Еуропа чемпионы, Олимпиада жүлдегері ресми түрде әйелдер командасының ойыншысы атанды.
Дарья келісімшартқа отырды және жақын арада команданың жаттығу процесіне қосылады. Оның ауысуы украиналық спорт үшін жарқын оқиға ғана емес, сонымен қатар әйелдер футболын танымал ету жолындағы қадам», — делінген «Металлист 1925» клубының Instagram-парақшасында.
25 жастағы Дарья Билодид – Украина тарихындағы ең үздік дзюдошыларының бірі. Ол 48 келіде 18 және 19 жасында қатарынан екі рет әлем чемпионы атанды. 21 жасында Токио Олимпиадасының қола жүлдесін олжалаған. Токио Олимпиадасынан кейін 57 келіге ауысып, әлемдік Гран Слэм турнирлерінде жүлдегерлер қатарынан көрінді. Еуропа чемпионатында топ жарған. 2024 жылы Париж Олимпиадасына қатысып, екінші айналымда жапон қызы Харука Фунакуводан шидо саны бойынша жеңілген. Париж Олимпиадасынан кейін әлі күнге дейін бірде-бір жарысқа қатыспады.
Айта кетейік, Дарья Билодид – жай спортшы ғана емес, Украинада танымал топ-модель. Сонымен қатар, Ресейдің Украинаға жасаған агрессиялық соғысына ашық қарсы шығып, өзінің қайсарлығын көрсеткен спортшылардың бірі.
Фото: instagram.com/dariabilodid7.
