Себебі Дияр таразыда жартылай ауыр салмақтағы межеден 2,5 келіге ауыр болып шықты. Дегенмен бразилиялық Брендсон Рибейро (16-7-0-1) жекпе-жекті өткізуге келісті. Сөйте тұра Дияр қомақты айыппұл арқалады.
«Вестник ММА» telegram-арнасының мәліметінше, ол тіпті үздік лигадан қуылуы да мүмкін.
«UFC-дегі жаза тура айтатын болсақ, Дияр өз сыйақысының 25 пайызын қарсыласына береді. Бұдан бөлек, ол жеңіліп қалса немесе ойдағыдай өнер көрсете алмаса, онда UFC-дегі келісімшартынан айырылуы мүмкін», — деп жазды автор.
Үміткерлер сериясынан келгендер UFC-дегі алғашқы айқасында әдетте 12 мың доллар алса, жеңіске жеткен жағдайда оларға тағы осынша сыйақы беріледі. 12 мың доллардың 25 пайызы дегеніміз — 3 мың доллар. Яғни Дияр 1,5 млн теңгеден қағылады деген сөз.
Айта кетейік, Диярдың таразыдағы салмағы 95,48 келі болды, ал UFC-дің жартылай ауыр салмақ дивизионындағы лимит 93 келіні құрайды.
