Қазақстан хоккейшілері қысқы Универсиада ойындарына көп-көрім нәтижеге қол жеткізіп жүруші еді…
Нақты, көрсеткіштерімізге үңілер болсақ, сонау, 1993 жылдан бері 1 алтын, 4 күміс, 2 қола еншілегенбіз. Реті келгенде айта кетейік, 1995 жылы топ жарып, жеңімпаз атанғанбыз. Сол жолы Чехия күмісті, Ресей қоланы қанағат тұтқан.
Ал өткен Универсиадада 3-орынға ие болып, қола медаль олжалап қайтқанбыз. Бұдан екі жыл бұрын, яғни 2023 жылғы Лейк-Плэсидте (АҚШ) өткен ХХХІ дүниежүзілік Универсиадаға студент хоккейшілерімізді Ғалым Мәмбетәлиев бастап барған.
Онда біздің құрама тек АҚШ және Канада құрамаларынан ғана ұтылған болатын (екі матчта да 1:4 есебімен). Америка студенттеріне өз тобында есе жіберіп алып, жартылай финалда «Үйеңкі жапырақтылар» құрамасынан аса алмаған.
Есесіне қола медаль үшін өткен матчта Жапонияның жанкешті жігіттерін 8:1 есебімен тас-талқан қылған болатын. Жалпы, жеті ойын өткізіп, оның бесеуінде жеңіске жетті. Айтпақшы, Ғалымның құрамасы өз тобында Словакия студенттерінен 4:0 есебімен басым түскен болатын…
Осы жолы біздің студенттерімізді бүкіләлемдік Универсиадаға Георгий Верещагин бастап баруы керек болатын. Алайда, соңғы сәтте бас бапкеріміз ауысып, тізгін Олег Болякинге ұстатылды.
Осы маман өзін Ғалымнан «білікітімін» деп ойлайтын секілді. Бірақ іс жүзінде мүлде басқаша сияқты. Болякин бастап барған Қазақстан құрамасы ХХХІІ қысқы Универсиада бес ойын өткізіп, оның үшеуінде ұтылды. Өз тобында Канада мен Чехияға есе жіберіп, ширек финалда Словакия студенттерінеен ұтылып қалды (1:2).
Сөйтіп, «білікті» Болякин бастап барған құрамамыз жартылай финалға да жете алмай, үйге қайтатын болды. 2023 жылдан бері «Барыс» хоккей клубында басшы да, бапкер де болып, бетке ұстар командамызды қайраңға киліктіріп еді. Енді, міне, студенттер құрамасының да бағын байлады…
Нұрғазы САСАЕВТЫҢ жазбасы.
