Fonteam подкастының қонағы Фарер аралдарымен аяқталған матчтан кейін құрама бапкерінің қызметінен кетуін ашық талап етті, деп жазады penalty.kz.
«Мұндай ойындарды көтере алмаймыз»
Қазақстан құрамасы Ұлттар лигасының кезекті матчында Фарер аралдарымен тең түскеннен кейін «Fonteam» YouTube арнасындағы подкастта эфир қонағы Джон ван ‘т Шкиптің дереу отставкаға жіберілуін талап етті.
Подкаст қонағының айтуынша, құраманың төрт матчтағы көрсеткішінен кейін бапкерге қатысты шешімді созбалаңға салуға болмайды.
«Бүкіл қазақ жанкүйерлерінің атынан айта аламыз: Джон ван ‘т Шкипті отставкаға жіберу керек. Басқа амал жоқ. Мұндай ойындарды көтере алмаймыз», – деді подкаст қонағы.
Сонымен қатар ол бас бапкердің кетуі Қазақстан футболындағы барлық мәселені шешпейтінін ескертті. Бір адамды ауыстырумен қалған проблемаларды жабуға болмайды.
«Джон ван ‘т Шкипті алып тастап, басқа проблемаларды жауып тастаудың да керегі жоқ», – деді подкаст қонағы.
Эфирде тағы не айтылды?
Студияда болған комментатор Әлімжан Асқардың сөзінше, Ұлттар лигасындағы барлық төрт матчта көңіл көншітерлік ойын көрмеген. Не шабуылда, не қорғаныста серпіліс байқалмады.
Эфирде Ұлттар лигасындағы төрт ойында соғылған бес голдың төртеуін қорғаушылар – Темірлан Ерланов, Нұралы Әліп және Сергей Малый соққаны айтылды. Фарер аралдарына қарсы матчта да есепті қорғаушылар теңестірді.
Комментатор Ерсін Ерік келесі ойынға жанкүйер ретінде баратынын, бірақ бас бапкерді көргісі келмейтінін жеткізді.
«Бұл федерацияның командасы емес. Өз командамды қолдаймын, барамын. Бірақ Джонды көргім келмейді. Келесі ойында бізді жеңіске жетелей алмайды ол кісі», – деді Ерсін Ерік.
Студияда бұдан бөлек Қазақстан футбол федерациясының жұмысы, трансляция мәселесі, матчтарды ұйымдастыру және жанкүйерлерді тарту бағытындағы олқылықтар да сөз болды.
Фото: kff.kz.
