Жекпе-жек 17 қазанда Өзбекстанның Ташкент қаласындағы Humo Arena спорт кешенінде өтеді. Қос спортшы IBA Nomad 16 турнирінде жеңіл салмақта бақ сынайды.
«Тәжірибе мен жастықтың айқасы. IBA Nomad-тағы алғашқы кездесуін нокаутпен аяқтаған Жалғас Жұмағұлов жаңа сынға дайын. Оның қарсыласы — тәжірибелі әрі қауіпті спортшылармен бәсекелесе алатынын дәлелдеген жас боксшы Асрор Ақпархожаев», — делінген Nomad Fighting мәлімдемесінде.
Ақпархожаев — тәжікстандық тегі бар ресейлік кәсіпқой боксшы әрі поп-ММА өкілі. Ол Hardcore Boxing лигасының чемпионы атанған. Сонымен қатар Nomad FC, AllstarsBoxing және PRIME FL ұйымдарының жарыстарына қатысқан.
Жұмағұлов соңғы рет 6 маусымда Словакияның Братислава қаласында өткен Oktagon 89 турнирінде өнер көрсетті. Оның бразилиялық Игор Севериномен чемпиондық жекпе-жегі қарсыласының шаптан абайсыз соққы жасауына байланысты нәтижесіз аяқталған еді.
Фото: IBA.
