Португалия құрамасы мен «Әл-Наср» клубының 39 жастағы шабуылшысы Криштиану Роналду өз мансабындағы 908-ші голын соқты, деп жазады 1bol.kz.
Азия Чемпиондар лигасы Батыс аймағы турнирінің төртінші турында саудиялық «Әл-Наср» өз алаңында «Әл-Айн» командасын қабылдаған болатын. Португалдық шабуылшы бұл матчта бір гол соғып, клубының жеңуіне атсалысты.
Аталған ойын 5:1 есебімен аяқталған. Есепті 5-минутта Талиска ашып, алаң иелерін алға шығарса, 31-минутта Роналду таблодағы көрсеткішті 2:0-ге жеткізді. Ал, араға алты минут салып Кардозу «Әл-Насрдың» үшінші голын соқты. Қонақтар екінші таймда бір голмен жауап бергенімен, алаң иелері тағы екі гол соқты.
Айта кетейік, биылғы маусымда Роналду 13 матчқа қатысып, барлығы 9 гол соқты және нәтижелі үш пас берді. Ол саудиялық клубпен 2025 жылдың жазына дейін келісімшарт жасасқан.
Фото: Getty Images.
