4-9 тамыз аралығында Алматыда FIDE тарихындағы университеттік командалар арасындағы тұңғыш әлем чемпионатының финалы өтеді.
Алматы университеттер арасындағы FIDE командалық әлем чемпионатының алғашқы финалын қабылдайды. Жарыстың ашылу салтанаты 4 тамызға жоспарланған.
Шешуші кезеңде әлемнің жетекші жоғары оқу орындарын таныстыратын 16 команда бақ сынайды. Олардың қатарында шахмат клубтарының тарихы 150 жылдан асатын Оксфорд, Кембридж және Гарвард университеттері бар.
Турнирдің іріктеу кезеңінде 49 мемлекеттен 79 университеттік команда өнер көрсетті. Алматыдағы финалға Еуропа, Азия, Солтүстік және Оңтүстік Америка құрлықтарының өкілдері жиналады.
Қазақстан атынан жарысқа әл-Фараби атындағы Қазақ ұлттық университеті және Қазақ ұлттық спорт университеті қатысады.
Финалға шыққан 16 команданың сегізі онлайн іріктеу арқылы жолдама алды. Қалған сегіз ұжым ұйымдастырушылардың арнайы шақыртуына ие болды.
Әлем чемпионатының форматы қандай?
Топтық кезеңде командалар төрт топқа бөлінеді. Әр топта төрт ұжымнан ойнап, үздік нәтиже көрсеткендер плей-офф кезеңіне жолдама алады.
Кездесулер төрт шахмат тақтасында өтеді. Турнир ережесіне сәйкес әр команданың құрамында кемінде бір ер және бір әйел шахматшы болуы міндетті. Жарыстың жалпы жүлде қоры – 50 мың еуро.
Негізгі турнирмен қатар 4–5 тамыз күндері Алматыда 18 жасқа дейінгі Қазақстан құрамасы мен әлем құрамасы арасында арнайы матч өтеді.
Бұл кездесуге барлығы 24 жас шахматшы қатысады. Ұйымдастырушылардың айтуынша, матч талантты спортшылардың тәжірибе жинауына және халықаралық деңгейде өздерін көрсетуіне мүмкіндік береді.
Фото: baq.kz.
