Ел чемпиондары еурокубоктың негізгі кезеңінде ойнайды, дейді penalty.kz.
Рафаэль Оразбахтинның шәкірттері Чемпиондар лигасының жаңа маусымын бірінші іріктеу кезеңінен бастады.
Алматылықтар алғашқы раундта Черногорияның «Сутьеска» клубын екі матчтың қорытындысы бойынша жеңді. Ал екінші іріктеу кезеңінде Кипрдің «Омониясын» жарыс жолынан шығарды.
Чемпиондар лигасының үшінші іріктеу кезеңіне жолдама алғаны үшін «Қайратқа» 525 мың еуро көлемінде сыйақы қарастырылған. Бұл қаражат қазіргі бағаммен шамамен 285,2 миллион теңге. Дегенмен алматылық клубтың осы маусымдағы жалпы табысы мұнымен шектелмейді.
«Қайрат» еурокубоктың негізгі кезеңіне қатысады
Алматылық команда осы маусымда еурокубоктардың бірінің негізгі кезеңінде міндетті түрде өнер көрсетеді.
«Қайрат» ең кемінде Конференциялар лигасының жалпы кезеңіне қатысады. Бұл турнирдің негізгі кезеңіне шыққан клубтарға 3,17 миллион еуро немесе шамамен 1,72 миллиард теңге төленеді.
Осылайша үшінші іріктеу кезеңіне шыққаны үшін берілетін 525 мың еуроны қоса есептегенде «Қайраттың» кепілдендірілген табысы 3,695 миллион еуроға жетеді. Теңгеге шаққанда бұл сома шамамен 2 миллиардқа тең.
Алматылық клуб табысын әлі де арттыра алады
Бұл — «Қайраттың» қазіргі кезеңде кепілдендірген ең төменгі сыйақысы.
Егер команда Чемпиондар лигасының келесі кезеңдерінде жеңіске жетіп, Еуропа лигасы немесе Чемпиондар лигасының негізгі кезеңіне жолдама алса, клубтың табысы айтарлықтай артады.
Сонымен қатар негізгі кезеңдегі әрбір жеңіс пен тең ойын үшін қосымша сыйақы төленеді.
Алматылық клуб еурокубоктардың негізгі кезеңіне екінші маусым қатарынан қатысады.
Фото: instagram/@f.c.kairat.
