Турнир 2027 жылдың 9-14 ақпаны аралығында өтеді. Астана мұз айдынында Азия, Америка, Африка және Океанияның ең мықты мәнерлеп сырғанаушылары бақ сынайды.
Бұған дейін Қазақстан 2011 жылғы қысқы Азия ойындарын және 2017 жылғы қысқы Универсиаданы қабылдаған.
Шайдоровтың тарихи жеңісінен кейін қызығушылық артты
ISU мәліметінше, бұл шешім Қазақстанда мәнерлеп сырғанаудың танымалдығы күрт өскен кезеңмен тұспа-тұс келіп отыр. Бұған Михаил Шайдоровтың тарихи жетістігі үлкен әсер етті.
ISU басшысы Астананың мүмкіндігін жоғары бағалады
Халықаралық конькишілер одағының президенті Ким Джэ Ёль Қазақстанда төрт құрлық чемпионатын алғаш рет өткізу маңызды оқиға екенін атап өтті.
«Біз мәнерлеп сырғанаудан төрт құрлық чемпионатын Қазақстанда алғаш рет өткізетінімізге қуаныштымыз. Бұл Орталық Азиядағы жанкүйерлер үшін әлемдік деңгейдегі жарысты өз көзімен көруге және мұз айдынындағы сүйікті спортшыларын қолдауға тамаша мүмкіндік. Қазақстанда мәнерлеп сырғанаудың танымалдығы жаңа деңгейге көтерілді. Астана спортшылар, жанкүйерлер және турнирге қатысушылар үшін тамаша алаң болады деп сенеміз. Біз Қазақстан бұл жарысқа әкелетін ерекше энергияны, қонақжайлықты және амбицияны сезінуді асыға күтеміз», — деді Ким Джэ Ёль.
Фото: olympic.kz.
