Қазақстан чемпионы еурокубоктағы жорығын черногориялық клубқа қарсы бастайды, деп хабарлайды penalty.kz.
Швейцарияның Ньон қаласында Чемпиондар лигасының бірінші іріктеу кезеңінің жеребе тарту рәсімі өтті. Оның қорытындысы бойынша Қазақстан атынан сынға түсетін алматылық “Қайраттың” алғашқы қарсыласы белгілі болды.
Қазақстандық клуб еурокубок маусымын Черногорияның “Сутьеска” командасына қарсы матчтармен ашады.
Қос команда арасындағы алғашқы кездесу Алматыда, қарымта матч Черногорияда өтеді.
Бірінші іріктеу кезеңінің ойындары 7-8 және 14-15 шілде күндеріне жоспарланған. Матчтардың нақты күні мен басталу уақытын УЕФА кейінірек ресми түрде жариялайды.
“Қайрат” үшін маңызды еурокубок маусымы
Алматылық клуб алдағы маусымда тағы да халықаралық аренада ел намысын қорғауға мүмкіндік алып отыр. “Қайрат” үшін бұл іріктеу кезеңі Чемпиондар лигасының негізгі кезеңіне апарар жолдағы алғашқы сынақ болмақ.
Айта кетейік, өткен маусымда “Қайрат” Чемпиондар лигасының іріктеу кезеңдерінде сәтті өнер көрсетіп, төрт кезеңнен сүрінбей өткен еді.
Осылайша алматылық клуб Қазақстан тарихында “Астанадан” кейін Чемпиондар лигасының негізгі кезеңіне жолдама алған екінші команда атанды.
Фото: instagram/@f.c.kairat.
