Екінші орта салмақтағы бұрынғы абсолютті әлем чемпионы, мексикалық Сауль Альварес (63-3-2, 39 нокаут) алдағы кездесуіне қатысты нақты шешімге жақындады. Оның рингке қайта оралуы 12 қыркүйекте Эр-Риядта өтеді деп жоспарланып отыр, деп жазады 1bol.kz.
Қазіргі таңда басты үміткерлердің бірі – WBC тұжырымы бойынша әлем чемпионы, франциялық Кристиан Мбилли (29-0-1, 24 нокаут). Дегенмен, келіссөздер әлі аяқталған жоқ, сондықтан ол тек ықтимал қарсыластар тізімінде.
Дереккөздердің айтуынша, Канелоның келесі қарсыласы кім болса да, мансабындағы ең жоғары сыйақыға ие болады.
Альварес шешім қабылдауға асығар емес. Ол алдымен алдағы титулдық айқастардың нәтижесін күтпек: WBA чемпионы Хосе Ресендис Хайме Мунгиямен кездеседі, ал WBO белбеуі үшін Хамза Шираз бен Алем Бегич күш сынасады.
Сондай-ақ ықтимал қарсыластар қатарында америкалық, орта салмақтағы бұрынғы әлем чемпионы Джермалл Чарло (34-0, 23 нокаут) да бар. Соңғы сөз, әдеттегідей, Альварестің өзіне тиесілі.
Фото: Getty Images.
