Бұл туралы ол өзінің Instagram парақшасында айтты.
«Жекпе-жекке дайындалып жатырмыз. 5 қыркүйекте Алматы қаласы, Балуан шолақ атындағы спорт сарайында үлкен жекпе-жек өткіземін. Бұл айқастың жауапкершілік жүгі де ауыр, күтіңіздер», — деді Жанқош Тұраров
Сондай-ақ бұл бокс кешінде Қазақстанның ең сұлу боксшысы атанып кеткен Балауса Мұздыман да жұдырықтасады. Қос боксшы бұған дейін Америкаға беріп келіссөздер жүргізген. Олардың қарсыластары кім екені әзірге белгісіз.
Айта кетейік, соңғы рет Жанқош Тұраров 2023 жылдың қазан айында шаршы алаңға шыққан. Ол кезде жапондық Акихиро Кондоны төрешілер шешімімен жеңіп, чемпиондық атағын қорғаған.
Осыдан кейін боксшы 1 жылдан астам уақыт бойы жекпе-жек өткізбегендіктен, спортшының IBO белдігінен айырылуы мүмкін деген ақпарат тараған. Себебі ережеге сәйкес, IBO чемпионы жылына кемінде бір рет титулын қорғауы қажет.
Фото: instagram.com/zhankoshturarov.
