Орта салмақтағы WBO және IBF тұжырымдары бойынша әлем чемпионы, қазақстандық боксшы Жәнібек Әлімханұлы (17-0, 12 КО) кезекті мәлімдеме жасады. Ол WBC белбеуінің иегері, доминикандық Карлос Адамеспен (24-1-1, 18 КО) айқасуға дайын екенін жеткізді, деп жазады penalty.kz.
Жанкүйерлердің тілегі — андеркардтағы Жәнібек пен Адамес
10 маусым күні Сауд Арабиясынан шыққан бокс меценаты Турки Аль аш-Шейх «Канело» мен Кроуфорд арасындағы жекпе-жектің 13 қыркүйекте өтетінін ресми жариялады. Осыдан кейін жанкүйерлер әлеуметтік желіде Жәнібек пен Адамес жекпе-жегін кештің андеркардына енгізуді сұрай бастады.
Жәнібек бұл ұсынысқа қолдау білдіріп, әлеуметтік желіде мынадай жазба қалдырды:
«Әлеуметтік желілерді шолып отырып, жанкүйерлердің менің Адамеспен болатын жекпе-жекті «Канело» — Кроуфорд кешіне қосу туралы өтініштерін жиі көремін. Мен дайынмын! Бұл ұсынысты қуана қабылдаймын!», — деп жазды Әлімханұлы өзінің X (бұрынғы Twitter) парақшасында, Турки Аль аш-Шейхтің аккаунтын белгілей отырып.
Үш белбеу — бір кеште
Егер бұл жекпе-жек жүзеге асса, орта салмақтағы үш чемпиондық белбеу сарапқа салынады:
- WBO — Жәнібек Әлімханұлы
- IBF — Жәнібек Әлімханұлы
- WBC — Карлос Адамес
Мұндай жекпе-жек қазақстандық боксшы үшін мансабындағы ең ірі айқастардың бірі болмақ.
Фото: sportnews.kz.
