Қазақстанның бірінші, әлемнің 24-ракеткасы Александр Бублик АҚШ ашық чемпионатының ширек финалына шыға алмады.
Қазақстандық теннисші төртінші айналымда әлемнің 1-ракеткасы, италиялық Янник Синнерге тап болды.
Қарсыластар осыған дейін алты рет кездесіп, соның төртеуінде Синнер жеңген еді. Биыл Ролан Гаррос турнирінің ширек финалында италиялық спортшы 6:1, 7:5, 6:0 есебімен басым түссе, жарты айдан кейін Бублик Германиядағы Галле жарысында қарымта қайтарған – 3:6, 6:3, 6:4.
Бұл жолы ойын Я.Синнердің айқын басымдылығымен аяқталды – 6:1, 6:1, 6:1.
Бір сағат 21 минутқа созылған бәсекеде италиялық теннисші 8 эйспен бірге 17 брейк-пойнттың сегізін өз есебіне жазды. Бублик 2 эйспен шектелді.
Спорттық жолында АҚШ біріншілігінің алғаш рет төртінші айналымына шыққан А.Бублик қазіргі кезде ATP Live рейтингісінде 19-орынға көтеріліп тұр.
Қазақстанның жұптық сындағы бірінші ракеткасы Анна Данилина да ширек финалдан тыс қалды. Ол сербиялық Александра Круничпен бірге үшінші айналымда доданың 7-ракеткалары, америкалық Айша Мухаммад – нидерландылық Деми Схурсқа жол берді – 2:6, 6:4, 4:6.
Фото: ҚТФ.
