Алматылық «Қайрат» пен Словакия құрамасының бұрынғы қорғаушысы Лукаш Тешак ASnews.kz сайтына берген сұхбатында алматылық команданың Чемпиондар лигасында «Реалға» қарсы өтетін ойыны туралы пікірімен бөлісті.
«Иә, мен жеребені көрдім. Бір жағынан олардың «Реал Мадридпен» ойнайтынына қуаныштымын, бірақ екінші жағынан қиын болады. «Қайратта» гол соғатын біраз мүмкіндіктер болады, оларды пайдалану керек. Дегенмен, «Реал Мадридтің» жеңіске жету мүмкіндігі жоғары. Футболда әрдайым ғажайыптар болуы мүмкін. Мүмкіндік бар. Мен бұл ойынды тамашалаймын және «Қайратқа» сәттілік тілеймін!» – деді Тесак.
2016 жылы Лукаш Тесак «Қайрат» сапында 21 матч өткізіп, бір гол соқты, үш нәтижелі пас берді. Дебюттік матчында ол команданың Қазақстан Суперкубогында жеңіске жетуіне үлес қосты.
30 қыркүйекте Алматыда Чемпиондар лигасының екінші тур ойыны өтеді. «Қайрат» тарихында алғаш рет «Реал Мадридті» қабылдайды. Бұл алматылық клубтың ЧЛ аясында өз алаңында өткізетін алғашқы ойыны болмақ.
Алғашқы ойында «Қайрат» Лиссабонда «Спортингке» 4:1 есебімен жеңіліп, жалғыз голды Эдмилсон соққан еді.
Фото: Лукаш Тесак
