Кешегі «Қайрат» — «Селтик» кездесуінен кейін шетелдік басылымдар алматылық клубтың қақпашысы жайлы жарыса жазып жатыр. Соның ішінен әрбір ойындардан кейін футболшылардың статистикасын есептейтін Rising Stars XI парақшасы Темірлан Анарбековке таң қаларлық баға берді, деп жазады Аладоп.kz.
Х әлеуметтік желісіндегі жас әрі талантты футболшыларды бақылап, олардың өнерін сараптап отыратын Rising Stars XI парақшасы Темірлан Анарбековтің тарихи ойынына ерекше баға берді. Қазақстандық қақпашы «Селтикке» қарсы Чемпиондар лигасы плей-офф кезеңінде шынайы ерлік көрсетіп, «Қайратты» басты клубтық турнирдің топтық кезеңіне алып шықты.
«Темірлан Анарбеков сөздің тура мағынасында «Қайратты» 2025/26 маусымының Чемпиондар лигасына алып шықты.
— матчтың үздік ойыншысы;
— үш пенальтиді қайтарды;
— бес сэйв жасады;
— қақпасын құрғақ ұстады.
Нағыз қаһарман!», — деп жазды парақша.
Бұл ойында Анарбековтің батылдығы мен салқынқандығы ерекше көзге түсті. Үш бірдей пенальтиді қайтару — әлемдік деңгейдегі сирек кездесетін оқиға. Оның сенімді ойыны арқасында алматылық клуб алғаш рет тарихында Чемпиондар лигасының топтық кезеңіне жолдама алды.
Жас қақпашының бұл жетістігі қазақстандық футболдың жаңа дәуірінің бастауы ретінде бағалануда. Ал Rising Stars XI оны болашақта Еуропаның топ клубтары назарынан тыс қалмайтын, жарқын жұлдыздардың бірі деп атап өтті.
