«Селтик» клубының жанкүйерлері Чемпиондар лигасының іріктеу кезеңіндегі ойын кезінде клуб басшылығына қарсы наразылықтарын ашық білдірді. «Селтик Парк» аренасында 60 мың көрерменнің алдында өткен матчта Шотландиялықтар «Қайратпен» 0:0 есебімен тең түсті, деп жазады Аладоп.kz.
Ойын барысында жанкүйерлер трибунадан «Sack the board!» деп ұрандады. Бұл айқай клуб саясатына деген наразылықтың айқын көрінісі еді.
Жазғы трансферлік кезеңде «Селтик» 18 миллион фунт стерлингке ойыншыларын сатқанына қарамастан, жаңа футболшыларды сатып алуға небәрі 3 миллион фунт қана жұмсаған. Мұндай қаржылық шешімдер жанкүйерлердің ашу-ызасын күшейтуде.
Жаңадан келген ойыншылардың аздығы мен олардың әлеуетінің жеткіліксіздігі «Селтиктің» биік мақсаттарына жету мүмкіндігіне күмән келтіріп отыр. Осы жағдайдан кейін клубтың ішкі атмосферасы шиеленісіп, басшылыққа жанкүйерлер тарапынан қысым арта түсті.
Сарапшылардың пікірінше, егер клуб трансферлік саясатта белсендірек қадамдар жасамаса, жанкүйерлердің наразылығы одан әрі күшейіп, басшылыққа қарсы толқулар жалғасуы мүмкін.
