Португалиялық Криштиану Роналду «Әл-Насрдағы» жағдайға көңілі толмай, саудиялық клубтың матчтарына қатысудан бас тартып отыр, деп хабарлайды Vesti.kz сайты A Bola басылымына сілтеме жасап.
Дереккөз мәліметінше, футболшыны Сауд Арабиясының Мемлекеттік инвестициялық қорының (PIF) клубты басқару тәсілі қанағаттандырмайды. Роналдудың пікірінше, трансферлік нарықта әлдеқайда белсенді әрекет ететін бәсекелесі «Әл-Хиляльмен» салыстырғанда, PIF «Әл-Насрға» зиян келтіріп отыр екен.
Осыған байланысты Роналду Сауд Арабиясы чемпионаты аясында дүйсенбі күні (2 ақпан) өткен «ӘЛ-Риядқа» қарсы ойынға қатыспады.
Танымал инсайдер Фабрицио Романо да Роналдудың алдағы матчта алаңға шықпайтынын растады. Ол футболшының денсаулығында ешқандай мәселе жоқ екенін атап өтті. Алдағы уақытта бұл жағдайға қатысты қосымша мәліметтер жариялануы мүмкін.
Айта кетейік, PIF «Әл-Наср» мен «Әл-Хиляльдан» бөлек, Сауд Арабиясының тағы екі клубын — «Әл-Иттихад» пен «Әл-Ахлиді» тікелей басқарады.
Криштиану Роналду «Әл-Наср» сапында 2023 жылдан бері өнер көрсетіп келеді. Оның саудиялық клубпен келісімшарты 2027 жылға дейін жарамды.
Биылғы маусымда Про-лигада шабуылшы 18 матчқа қатысып, 17 гол соғып, бір нәтижелі пас берген.
Фото: ©x.com/alnassrfc_en.
