Қаңтар айының аяғында IX қысқы Азия ойындарына Қазақстан спортшыларын шығарып салу рәсімі өтеді. Бұл туралы Үкімет отырысында ҚР Туризм және спорт министрі Ербол Мырзабосынов мәлім етті.
— Азия ойындарына шығарып салу рәсімін 30 қаңтар күні Астана қаласындағы «Қазақстан» жеңіл атлетика спорт кешенінде өткізу жоспарланып отыр. Үміткерлердің арасында жоғары спорттық жетістіктер мен мүмкіндіктерге ие спортшылар қамтылған. Биатлоннан 2023 жылғы қысқы Универсиаданың жүлдегері Александр Мухин және 2019 жылғы Универсиаданың екі дүркін жүлдегері Әсет Дүйсенов, шаңғы жарыстарынан Надежда Степашкина, конькимен жүгіру спортынан Надежда Морозова, Алтай Жәрдембекұлы, сондай-ақ шорт-тректен Азия ойындарының қола жүлдегері Абзал Әжіғалиев және 2024 жылғы әлем чемпионатының күміс жүлдегері Денис Никиша бар, — деді Е.Мырзабосынов.
Оның айтуынша, фристайл-акробатикадан айтарлықтай перспективасы бар спортшылар: 2023 жылғы Еуропа кубогы кезеңінің жеңімпазы Шерзод Хаширбаев, 2023 жылғы Еуропа кубогының қола жүлдегері Аяна Жолдас.
— Аталған спортшылар еліміздің жүлделер қоржынына өз үлесін қосады деп үміттенеміз. Ұлттық құрамалардың дайындығының жауапкершілігі 10 дисциплина бойынша бас бапкерлерге жүктеледі. Олар – спортшылардың сәтті өнер көрсетуіне барлық күш-жігерін салатын білікті мамандар. Қазақстандық бапкерлермен қатар, спортшыларды сапалы дайындау үшін Нидерланды, Польша, Словения, Беларусь және Ресей Федерациясынан 9 жаттықтырушы-консультант тартылды. Олар спорттың 4 түрі бойынша жұмыс істейді: биатлон, конькимен жүгіру спорты, шорт-трек және мәнерлеп сырғанау, — деді министр.
Сонымен қатар ведомство басшысы Азия ойындарындағы ту ұстаушыларды атады. Бекетаев Әділ Маратұлы – Қазақстан Республикасының хоккейден спорт шебері, жастар арасындағы әлем чемпионатының қола жүлдегері және жеңімпазы. Тихонова Ольга Александровна – шорт-тректен халықаралық дәрежедегі спорт шебері, 2017 жылы өткен Азия ойындарының қола жүлдегері, сондай-ақ Дүниежүзілік Универсиада жүлдегері.
Бұдан бұрын хабарланғандай, Қытайда өтетін IX қысқы Азия ойындарына Қазақстаннан 138 спортшы барады.
Фото: Kazinform.
