Қазақстандық аралас жекпе-жек шебері Қуат Хамитов ресейлік Мариф Пираевпен төбелесуден бас тартты. Қос файтер кәсіпқой бокс ережесімен 27 желтоқсанда Алматыда жұдырықтасуы керек еді, деп жазады 1bol.kz.
«Мен үнемі жарақатпен төбелесе бере алмаймын. Сондықтан, келесі жолы кездесерміз», — деп жазды Хамитов өзінің Instagram-парақшасында.
Бұл ақпаратты All Stars Boxing ұйымы да растады. Аталған компания – Алматыдағы бокс кешінің ұйымдастырушысы.
«Өкінішке қарай, 27 желтоқсанға жопарланған Қуат Хамитов пен Мариф Пираев арасындағы жекпе-жек болмайтын болды, басқа уақытқа жылжытылады. Мұндай шешімді бокс комиссиясы Қуат Хамитовтің жарақат алғанынан кейін қабылдады», — делінген аталған ұйым таратқан хабарламада.
Дегенмен, спортшының өзі де, жарыс ұйымдастырушылары да нақты қандай жарақат болғанын айтқан жоқ. Хамитов бұған дейін Алматыда өткен бокс кешінде өнер көрсетіп, Нұрберген Шәріпті жеңді.
Фото: instagram.com / kuat__khamitov.
