Футболдан Премьер-лига командалары арасындағы ел біріншілігінің ХVIIІ турында Шымкенттің «Ордабасы» клубы түркістандық «Тұранды» ірі есеппен жеңді, деп жазады ҚазАқпарат.
Түркістандық команда биылғы біріншілікті сәтсіз өткізіп келеді. Қазір олар турнир кестесінде небәрі 11 ұпаймен он үшінші орында тұр. Ал «Ордабасы» алдына үздіктер қатарынан көріну міндеті қойылған. Дегенмен олар да турнир кестесінде ортаңғы тұсында келе жатыр. Сондықтан түркістандық команда үшін бүгінгі кездесуде жеңіске жету маңызды болатын.
Бірінші кезеңде командалар бір-бірінің қақпасынан саңылау таба алған жоқ. Есесіне екінші кезеңде «Ордабасы» қатарынан төрт гол соғып кетті. Алдымен Владислав Наумец 65-минутта есеп ашса, одан кейін Дарио Чанаджия 75, Лука Имнадзе 77, Сергей Малый 96-минутта мергендік танытты.
Осылайша «Ордабасы» қарсыласынан 4:0 есебімен басым түсіп, турнир кестесінде жетінші орынға көтерілді. Ал «Тұран» қатарынан оныншы мәрте жеңілістің ащы дәмін татты.
Сондай-ақ 26 шілдеде алматылық «Қайрат» сырт алаңда Қостанайдың «Тобылын» 3:1, өз алаңында семейлік «Елімай» Талдықорғанның «Жетісуын» 3:0, қызылордалық «Қайсар» Петропавлдың «Қызылжарын» 1:0 есебімен жеңді.
Ал 25 шілдеде «Жеңіс» (Астана) пен «Оқжетпес» (Көкшетау) 0:0 есебіне қанағат білдірді. Бұл турдағы 30 сәуірде алдын ала өткізілген ойында «Атырау» өз алаңында «Астанаға» 0:2 есебімен жол берген еді.
Аталған турдағы «Ұлытау» (Жезқазған) мен «Ақтөбе» кездесуі 20 қыркүйек күні өткізіледі.
Фото: «Ордабасы» футбол клубы.
